भावेश भुमरी इन एच के

प्रकाशित मिति
0
367

‘जुध्दबहादुर पुन हो मेरो वास्तविक नाम । हिंजोको दिनमा नाम थर लेख्दा म पीडित बनेको थिएँ , आजको दिनमा नाम थर नलेख्दा म पीडित भएको छु ।’
गीतकार भावेश भुमरीले आफ्नो नाम र कृति ‘भ’मय हुनुको रहस्य खोल्दै भने । आफ्नो वास्तविक नाम लेखेर रचना पत्रिकामा प्रकाशन गर्न पठाउँदा प्रकाशित नभएको तर तिनैलाई उपनाम बनाएर पठाउँदा प्रकाशित भएको उनले बताए । अढाई दशक अघिको संघर्षको समय संझिँदै उनले रचनाको पारिश्रमिक बुझ्न जाँदा पनि भावेश भुमरी भनेर जाँदा उनलाई नपत्याएर नदिइएको तीतो अनुभव बाँडे ।

‘भीर फूलको छायाँ’, ‘भीरै भीरको बाटो,”‘भाषा”,”भिन्नता”,”भिजेको चिठी”, आदि सबै कृति ‘भ’बाट शीर्षक राख्नुमा केवल संझन सजिलो होस् भन्ने आशय रहेको भावेश भुमरीले उद्घोषक जितकर्ण राईलाई बताए ।

मिति २४ अगस्ट साँझ चुम्लुङ हिमको हलमा साब्लाबुङ प्रकाशनको आयोजनामा ‘भावेश भुमरी एकल रचना वाचन’ कार्यक्रम मा सहभागी हुन पुगेको थिएँ । कार्यक्रम किन मलाई उल्लेख्य लाग्यो भने अनावश्यक ,अविश्वसनीय, अपाच्य तारिफ मुक्त रह्यो । उदाहरणको लागि कार्यक्रममा विमोचन गरिएको ‘भिसाको रङ’ बारे हङपाली समीक्षक कमल पौडेलले कडा टिप्पणी गर्दै भने पुस्तक बेल्पालीहरुले लेखकलाई बेलायत घुमाएकोमा लेखकको तर्फबाट यशगान र दैनिकी जस्तो छ । बेलायत गइरहेको र साथीभाइ चिनिरहेको आफूलाई किताबले नयाँ कुरा केही पस्किन नसकेको भन्दै आलोचना गरे । आफ्नो रोचक समीक्षा दिएर फटाफट निस्किए पनि, घोचक समीक्षा भएकोले आयोजकको तर्फबाट कदर पत्र र मायाको चिनो पाइन्छ भन्ने सायद उनले अपेक्षा गरेनन् ।

किराँती जेबी राईले २५ साल पहिले ‘मनोकामना’ र ‘साल्पा’ पत्रिकामा रचना पठाउने लेखक र संपादकको रुपमा आफूहरुको परिचय भएको भन्दै भावेशको आधा घन्टा लामो परिचय दिए । काठमाडौं देखि घुमाउँदै स्वर्गद्वारी हुँदै प्युठान पुर्‍याई अन्त्यमा, उनकै पत्रिकामा छापिएको पत्रमित्रता स्तम्भले भावेशको लगन गाँठो कस्सिए पनि हालसम्म भावेश र प्रनिताले मिठाई खुवाएका छैनन् भनेर बिट मारे ।

गायिका देवी थापालाई मैले पहिलो पटक सुनेँ, सुप्रसिध्द संगीतकार सिके रसाइली पुत्री गायिकाले भावेश भुमरी रचित “धनका लागि परदेशिएँ” साह्रै मीठोसँग गाइन् ।
गायक-संगीतकार गणेश पराजुलीले पनि रेडियो नेपालको प्रतियोगिता, गायकहरु बलराम समाल, कुबेर राई लाई संझिँदै कि बोर्ड बजाएर “घाम डुब्यो क्षितिज पर – मन डुब्यो वर” गाए । संगीतकार-गायक दिनेश सुब्बाले भावेशसँग आफ्नो परिचय वरिष्ठ कवि भूपाल राईले गराइदिएको संझिँदै त्यसपछि हालसम्म लगभग दर्जन गीतमा सहकार्य गरेको भन्दै हार्मोनियममा आफूद्वारा संगीतबध्द २ गीत सुनाए । संयोग कस्तो भने यता हङकङमा भावेशको पुस्तक विमोचन भइरहँदा उता नेपालमा भूपाल राईको दोस्रो गीत संग्रह विमोचन भइरहेको थियो ।

१३ कृति प्रकाशित गरेका भावेश भुमरीको कार्यक्रममा १४ कृति प्रकाशित गरिसकेका रामकृष्ण बान्तावालाई प्रमुख अतिथि बनाइएको थियो भने साहित्यकार टंक साम्बहाम्फे, मगर संघकी अध्यक्ष युगमाया राना ,सुनिता गिरी लगायतका ब्यक्तिहरुलाई मंचमा आसन ग्रहण गराइएको थियो । ८ बजे सुरु गरेर लगभग अढाई-तीन घन्टा चलेको कार्यक्रमलाई उद्घोषक जितकर्ण राईले उपस्थित दर्शकलाई फकाउँदै, हङकङमा आज दुईवटा भुमरी छ भनेर तर्साउँदै अन्त्य सम्मै बाँधेर राखे । टाइफुन सिग्नल १ जारी गरिए पनि वाइपा भुमरी पनि लेखक भुमरी जस्तै शान्त रहेको थियो, बरु चर्किरहेको थियो १२ औं हप्तामा प्रवेश गरेको सुपुर्दगी कानुन प्रस्तावले बल्झाएको सरकार विरुध्दको आन्दोलन । भाग्यले अन्तिम रेल चढेर कार्यक्रमको अध्यक्षता गर्न आइपुगेका आयोजक साब्लाबुङका संपादक राजकुमार राईले जंगिदै भने ” मैले पश्विमाञ्चलको प्युठानको भावेश भुमरीलाई ल्याउन किन पहल गरेँ? के मेरो जिल्ला संखुवासभामा या पूर्वाञ्चलमा साहित्यकार छैन? पश्चिमका साथीहरु नाचगान रमाइलोमा मात्रै भुल्नु भएन, कवि-साहित्यकार-बुध्दिजीवि पत्रकारहरुलाई पनि हङकङ बोलाएर विचार विमर्श गर्नुपर्‍यो । मगर संघले पनि यसतर्फ ध्यान दिनुपर्‍यो । “

खानपिन, तर्कसंगत मन्तब्य, भावेश भुमरीका मीठा गीतहरुले गर्दा भीडभाडको कार्यक्रम भए पनि कार्यक्रम अत्यन्तै स्वादिलो भयो । कार्यक्रमपछि सगुन क्लबको सानो भेलामा संपादक राईको भनाइँमा छलफल हुँदा मगर नेत्र प्रकाश जुनकीरीले सही थप्दै भने ,”हाम्रो गीत-नाचहरु पनि फेरि सबै फ्लर्टिङ् खाले मात्रै हुन्छ, भर्टिकल एक्सप्रेसन् , होराइजेन्टल इन्टेन्सन” । मलाई भने राजकुमार दाइले कम्मर भाँच्दै गरेको फेसबुके फोटोको याद आयो । आफ्टर अल, होराइजेन्टल इन्टेसन् इज नेचुरल मोटिभेसन् ।

  • रबाखारा

LEAVE A REPLY

Please enter your comment!
Please enter your name here