यसरी संपन्न भयो दिनेश प्रवास र नेपाली संगीत कार्यक्रम…

dinesh subba3

विगत २ दशक देखि हङकङमा बस्ने गायक दिनेश सुब्बाले पूर्वाञ्चल नेपालको इटहरीमा आफ्नो सांगीतिक प्रस्तुति दिएर आफ्नो छाप छोड्न सफल भएका छन् ।

हाल केही हप्ते नेपाल भ्रमणको क्रममा संगीत साधना प्रतिष्ठानको आयोजनामा शनिबार भएको “दिनेश प्रवास र नेपाली संगीत” विषयक कार्यक्रममा गायक सुब्बाले आफ्नो प्रस्तुति दिन भ्याएका हुन् ।

“बुध्द र सगरमाथा मात्रै होइन हामीले गाउनुपर्ने गीत
खुकुरी र आयो गोर्खाली मात्रै होइन हामीले गर्व गर्ने जीत
त्यो भन्दा अरु पनि हामी हौं, कुनै कुरामा कमी कहाँ छौं”
रेडियो नेपालमा ‘क’ श्रेणीका गायकको रुपमा क्यारियर सुरु गरेका सुब्बाले पहिलो प्रस्तुति आफ्नै शब्द र संगीत रहेको गीतबाट सुरु गरे । ‘भ्वाइस अफ हङकङ’ एल्बममा अन्तिम राईको गायनमा रहेको यो विचार गीत अहिलेको नेपालको राजनैतिक उदासिनता र निराशामा एक संगीतकारले दिन सक्ने सबैभन्दा उत्कृष्ट उपहार हो ।

“तिम्रो हाम्रो मनको दूरी बढे जस्तो छ’ (शब्द: क्षेत्र प्रताप अधिकारी संगीत:मानसिं थुलुङ)
“थाहा नपाई माया मेरो तिमी सित बस्यो है”(शब्द: बु्ध्दवीरलामा संगीत:दिनेश सुब्बा)
रेडियो नेपालमा उनकै स्वरमा हिट यी गानाहरु कुनै समय उमेर छँदा बैंशालु स्वरमा गाएका यी पचासे गायकको लिस्टबाट छुट्ने कुरै भएन ।

त्यसबाहेक उनी बाट संगीतबध्दगीतहरु चर्चित पुराना गीतहरु “हाम्रो सुन्दर संसार थियो (रचना: दिनेश सुब्बा, स्वर:रामकृष्ण ढकाल) “बादलुको घुम्टोले” (रचना: बुध्दवीरलामा, स्वर: एम बराल”),”हाँसु कति म आँशुहरु पिई(शब्द:रमण घिमिरे स्वर:रामकृष्ण) पनि सुनाए ।

“तिम्रो प्रतीक्षा रोए त के गरुँ
मलाई यो नशाले फकाउँछ”
माहौललाई अलिक नशालु बनाउन उनले स्व. बलि सुब्बाको शब्द र हङकङे गायक ज्ञान सुब्बाको स्वरमा रेकर्ड भएको गीत पनि प्रस्तुत गरे । त्यसमा एक खुड्किलो थप्दै सुनाए आफ्नो रेकर्ड नभएको नयाँ गीत , “मैले पिएर सधैं तिमीलाई विष हुन्छ भने” ।

गायक सुब्बाले प्रस्तुतिको अन्त्यमा उनकै शब्द-संगीतमा रहेको हङकङका बालबालिकाको गीति एल्बमको संग्रह “आमाकी नानी”बाट गाए:
“हिमाल पहाड मधेश तराई हाम्रो शान हो
मेची देखि महाकाली हाम्रो प्राण हो” ।

हिमालबाट हिमनदी तराई सम्मै बगेर एकताको सन्देश दिने यो एकताको गीत आफ्नो प्रस्तुतिलाई सुन्दर ढंगले बिर्को लाउने संगीतकार-गायक-शब्दकार सुब्बाको बुध्दिमत्तापूर्ण छनोट थियो ।

कार्यक्रमबारे बोल्दै संगीतकार सुब्बाले भने,” ९ गीतहरु प्रस्तुत गरेँ, अत्यन्तै सन्तुष्ट भएँ । पूर्वाञ्चलका वाद्यवादकहरु अत्यन्तै कुशल र  प्रतिभाशाली रहेछन्, त्यसमाथि बलराम समाल (गायक,संगीतकार, बाँसुरीवादक)को उपस्थितिले गर्दा संगीत संयोजन अति उत्कृष्ट रह्यो ।” हङकङकै गायक तथा वाद्यवादक राजु गुरुङ र धन थापा पनि दिनेश सुब्बालई हौसला दिन तथा कार्यक्रममा सहभागी हुन पुगेका थिए ।

संगीत साधना प्रतिष्ठानले संगीत क्षेत्रमा सुरु गरेको अभियानलाई अन्तराष्ट्रिय क्षेत्रबाट सहयोगको सुरुवात हङकङका नेपाली संगीतप्रेमी बाटै भएको हो । संगीतकार सुब्बाको गायनको दोस्रो एल्बम ‘नितान्त’ एल्बमबाट उठेको रकम प्रतिष्ठानलाई सहयोग स्वरुप दिइएको थियो । हाल प्रतिष्ठानले संगीत सिकाउने तथा अनुसन्धान गर्ने उद्येश्ले भवन तथा हल निर्माण गरिरहेको छ ।

पूर्वाञ्चल थात थलो भएका वरिष्ठ गायकद्वय दिप श्रेष्ठ र एल पि जोशीले पनि आफ्नो प्रस्तुति दिएर कार्यक्रमको शोभा बढाइदिए भने धनकुटा प्रमुख जिल्ला अधिकारी गायक विजय मानन्धरले पनि आफ्ना प्रस्तुति राख्न पछि परेनन् ।

कार्यक्रम भूमि सुधार तथा ब्यवस्था मन्त्री रामकुमार सुब्बाले हार्मोनियम बजाएर उद्घाटन गरे भने दिनेश सुब्बालाई नेपाली टोपी लगाएर गायनको उद्घाटन गरिएको थियो । कार्यक्रममा संगीतकार सुब्बाले एउटा भ्वाइलिन र अन्तराष्ट्रिय संगीतका पुस्तकहरु संगीत साधना प्रतिष्ठानका अध्यक्ष मणि गुरुङलाई हस्तान्तरण गरे ।  रिजाल भिजन इटहरीको मंचमा  संपन्न उक्त कार्यक्रमलाई Arena TV र Namaste FM बाट प्रत्यक्ष प्रसारण गरिएको थियो भने कार्यक्रमको मिडिया पार्टनर JP Media रहेको थियो ।

dinesh subba2

प्रमुख अतिथि मन्त्री सुब्बा, प्रतिष्ठान अध्यक्ष मणि गुरुङ, वरिष्ठ गायक दिप श्रेष्ठ र एल पि जोशी को हातबाट सम्मान ग्रहण गर्दै दिनेश सुब्बा

This entry was posted in Arts & Entertainment, Featured. Bookmark the permalink.

2 Responses to यसरी संपन्न भयो दिनेश प्रवास र नेपाली संगीत कार्यक्रम…

Leave a Reply

Your email address will not be published. Required fields are marked *